7 مانگ لەمەوبەر لە لایەن ئەدمین

فوائد البنوك وعلاقتها بالتضخم

لەم توێژینەوەیەدا، نووسەر (پ.د. عەلی محێدین قەرەداغی)، گفتوگۆ دەكات لەسەر فەتوای حەڵاڵ كردنی سووی بانكەكان، كە لە ساڵی 2002 لەلایەن كۆمەڵەی توێژینەوەی ئیسلامیەوە دەركرا و لەبەرگیراوەی فەتواكەی موفتیی میصر بوو (د. محمد الطنطاوي) كە لە ساڵی 1989 بۆ یەكەم جار فەتوای حەڵاڵیی سووی بانكە كلاسیكییەكانی دا.

گفتوگۆكەی نووسەر گفتووگۆیەكی زانستیی فیقهیی ئابووری و واقیعییە و سەرنجی خستۆتە سەر وەڵام دانەوە و ڕەت كردنەوەی ئەو بناغە فیقهییانەی كە فەتواكە پشتی پێ دەبەستێت؛  ئەویش بەپێی فیقهی میزان.

سەرەتا د. عەلی ئەو چوار ڕەگەزە دیاری دەكات كە فەتواكە لەسەری ڕاوەستاوە و پاشان هەر یەكێكیان بەپێی فیقهی میزان ڕەت دەكاتەوە، ئەوانیش بریتیین لە:

یەكەم- بانك وەبەرهێنان دەكات بە پارەكانەوە.

دووەم- بانك وەبەرهێنان دەكات پێیانەوە لە مامەڵە ڕێ پێدراوەكانی خۆیدا.

سێیەم- بانك قازانج دابەش دەكات.

چوارەم- قازانجەكە پێشەكیی بە ڕێكەوتن لەگەڵ كڕیارەكە دیاری دەكرێت.

د. عەلی لە درێژەی توێژینەوەكەیدا گومانی سەر ئەو پرسیارانە لادەدات كە ڕووبەڕووی پرسی سوو دەبێتەوە لە مامەڵە داراییەكاندا و تێكڕا ڕەدیان دەداتەوە.

لە بەشی دووەمی كتێبەكەیدا، نووسەر باس لە پەیوەندی نێوان سوو و هەڵئاوسان دەكات و كاریگەرییە نەرێنییەكانی سوو لەو ڕووەوە نیشان دەدات. هەروەك چۆن وتەی ئابووریناسانی نامسوڵمانی ڕۆژئاوایی و واقیعی خودی ڕۆژئاوا و ئەمریكا دەكاتە پاڵپشت و بەڵگەی قسەكانی و دەیسەلمێنێت كە سوو چارەسەر نییە بۆ هەڵئاوسان بەڵكو هۆكارە. دواتر بە وردی لەسەر چارەسەری هەڵئاوسان و هەڵوێستی ئابووریی ئیسلامی دەدوێت.

لە كۆتا بەشی كتێبەكەیدا، نووسەر گفتوگۆ دەكات لەسەر هۆكارەكانی دابەزینی نرخی لیرەی توركی و كاریگەرییەكانی و پاشان چارەسەرەكانی.

وردەكاریی سەرەكی لەبارەی كتێبەكەوە، ئەمانە دەگرێتەوە:

• زمانی كتێب: عەرەبی
• نووسینی: عەلی محێدین قەرەداغی
• ژمارەی لاپەڕە: 174
• ساڵی بڵاوبوونەوە: 2023

 

سەرنجەکان